La collecha nueva 2015 llánzase en toa España cola campaña “Sidra frente al cáncer”, en collaboración cola Fundación Sandra Ibarra. Axunta asina’l disfrute de la sidra de Manzana Seleccionada al avance de la investigación frente al cáncer

Cartel Sidra frente al Cáncer

La sidra de Manzana Seleccionada, sellu de calidá del que formen parte los llagares Sidra Trabanco, Peñón, Foncueva y Muñiz, presentó güei en Xixón la collecha nueva 2015. Dende güei, van ponese nel mercáu alrodiu de 1.500.000 botelles d’esta sidra, que s’estrema en dos aspectos: l’apueste pola mazana asturiano y la calidá controlada y certificada en tolos sos procesos, incluyendo una prueba final na que la sidra ha de pasar el notable pa llograr la contra-etiqueta d’esta marca.

Sidra frente al cáncer

La collecha 2015 presentada güei va ser, ensin dulda, la collecha de Manzana Seleccionada más solidaria. Coincidiendo cola so estrena, ponse en marcha la campaña “Sidra frente al cáncer”, desarrollada por Sidra de Manzana Seleccionada en collaboración cola Fundación Sandra Ibarra de Solidaridad Frente al Cáncer. Gracies a esta campaña, cada botella de la sidra sobre la madre de Manzana Seleccionada que se consuma en toa España va tar ayudando a financiar proyectos d’investigación frente al cáncer. Asina, la sidra de Manzana Seleccionada va destinar una parte de les ventes nacionales del estrenu de la collecha nueva 2015 a proyectos amparaos pola Fundación Sandra Ibarra.

Esta campaña súmase a les acciones que la sidra de Manzana Seleccionada y la Fundación Sandra Ibarra yá tienen en marcha, p’axuntar el disfrute de la llamada “sidra de selección” col avance na investigación frente al cáncer.

“Sabemos toos lo qu’implica el cáncer y lo importante que ye siguir investigando pa llograr que cure. Asina naz esta campaña, na que garra más sentíu que nunca disfrutar de la sidra nuevo de selección, sabiendo que con cada botella tamos ayudando a la investigación frente al cáncer”, esplica José Manuel Riestra, presidente de la sidra de Manzana Seleccionada.

Sidra sobre la madre

La sidra qu’estrena güei ye mui especial. Y non solo por ser solidario… tamién poles sos característiques. Ye la llamada “sidra sobre la madre”, que namás se puede disfrutar nesta época del añu, nes selmanes primeres de la collecha nueva.

Esta ye una sidra ensin trasegar, que posa sobre les sos propies llíes de fermentación, y que se distingue pol so carácter especialmente afrutao. Una sidra “tienro”, que diríen los probadores más avezaos.

Los llagares de Manzana Seleccionada recuperen asina la tradición de la “sidra sobre la madre”, una sidra mui estimao polos nuestros antepasaos y habitual nos meses de primavera.

Dende l’añu 2000, apostando pola mazana asturiano

La que se presenta güei ye la collecha númberu 15 de sidra de Manzana Seleccionada, un proyectu movíu por Sidra Trabanco, Sidra Peñón, Sidra Muñiz y Sidra Foncueva y que tien l’oxetivu d’ayudar al desarrollu del sector de la mazana de sidra n’Asturies, apostando por variedaes tradicionales y collechaes nel Principáu.

De fechu, la sidra de Manzana Seleccionada trabaya na recuperación de variedaes tradicionales de mazana, que taben en riesgu de desapaecer y que tanto aportaron (y, agora, van siguir aportando) a la sidra fecho n’Asturies.

El segundu gran oxetivu de la sidra de Manzana Seleccionada ye mover la cultura de calidá nel sector. Esta ye una iniciativa que cunta con un reglamentu d’usu, auditáu cada añu pola compañía Bureau Veritas Certification y que tien como control últimu una mesa de prueba, na que namás la sidra que pasa’l notable tien la contra-etiqueta qu’identifica a esta marca.

“Nestos quince años, fuimos afitándonos como una marca de referencia en calidá y saber facer. Si hai dalgo que nos dicen los consumidores ye que la sidra de Manzana Seleccionada ta siempre bueno y que’l so valor principal ye precisamente esi: ser una garantía de calidá na sidra. Vamos siguir trabayando pa que sía asina munchos años más”, esplica José Manuel Riestra, presidente de la Sidra de Manzana Seleccionada.

A la so consolidación n’Asturies, sígue-y el crecimientu en mercaos nacionales y internacionales. La sidra de Manzana Seleccionada ta siendo tamién un referente de calidá n’otres partes d’España y, poco a poco, va llogrando relevancia n’otros países, como Estaos Uníos, Alemania o inclusive Rusia.