Entamada pola Sidra d´Escoyeta, en collaboración cola Fundación Sandra Ibarra de Solidaridá frente al Cáncer, esta campaña remata con una recaldación de 4.000 euros, que van dir destinaos íntegramente a financiar proyectos d’investigación sobre’l cáncer.

Cartel Sidra frente al Cáncer

Gracies a la notable medría de consumu rexistráu en toa España, “Sidra frente al Cáncer” superó toles mires. Ello ye que anque primeramente taba previstu que durara namá dos meses, los llagares (Sidra Trabanco, Muñiz, Foncueva y Peñón) decidieron ampliala un mes más, incluyendo tamién xunetu. La resultancia: una recaldación final de 4.000 euros, que van dir destinaos íntegramente a financiar proyectos d’investigación sobre’l cáncer.

“Tamos bien satisfechos coles resultancies d’esta campaña. Impresionónos la gran acoyida del públicu, que dende’l primer momentu entornóse, espublizando en redes sociales esta campaña y solicitando nes sidreríes la nueva Sidra d´Escoyeta. Rexistremos un importante aumentu de vientes (más d’un 10%), y seguro que’l calter solidariu d’esta collecha 2015 tuvo enforma que ver. Lo importante, sía que non, ye l’aportación qu’ente toos realizamos por que se siga investigando sobre l’orixe del cáncer y sobre la so cura definitiva”, esplica José Manuel Riestra, presidente de la Sidra d´Escoyeta.

Más allá d’una campaña

La campaña “Sidra frente al cáncer” da continuidá a la implicación que caltien dende va dellos años la Sidra d´Escoyeta na investigación sobre’l cáncer. Esta implicación visualízase especialmente nos alcuerdos de collaboración cola Fundación Sandra Ibarra, como la organización cada añu de la “Espicha Solidaria frente al Cáncer”, un eventu que xune’l calter festivo y tradicional de la espicha asturiana con un oxetivu bien necesariu: siguir avanzando na cura d’esta enfermedá.

A finales de setiembre, va celebrase la tercer edición de la Espicha Solidaria. Como n’anteriores ediciones, l’eventu va abrir cola entrega de los Premios Sidra de Selección, otorgaos cada añu al Meyor Profesional y al Meyor Embaxador de la Sidra de Selección.