El llunes  5 de setiembre, a partir de les 19:00 hores, celebramos en La Felguera la última mesa de cata de la collecha 2015 de Sidra d´Escoyeta. ¿Te apuntes? 

La sidrería La Panera, na Felguera, va acoyer la última mesa de cata d’esta temporada. Ciérrase asina’l ciclu de calificaciones de la collecha 2015 de Sidra d´Escoyeta, abierto en abril en la Pola y que siguió con dos meses de cata celebraes en Xixón y la Villa respectivamente.

Los miembros del comité de cata, presidíu por Maximino Villarrica, van evaluar el llunes 5 la sidra presentada a calificación polos cuatro llagares ellaboradores d’esta marca, que’l so oxetivu ye impulsar la sidra calidable. Namá la que supere’l notable, como nota media, va poder salir al mercáu cola contra-etiqueta “Sidra d´Escoyeta”.

Esta mesa de cata vien precedida del notable aumentu de vientes rexistráu na sidra d´Escoyeta. En xunetu, el consumu aumentara en redol a un 10%, gracies al ésitu de la campaña “Sidra frente al Cáncer” (qu’algamó una donación de 4.000 euros destinaos a financiar proyectos d’investigación) y a la gran acoyida d’esta sidra calidable, tantu nel mercáu asturianu como nel restu d’España.

La del llunes va ser la última mesa de cata de la collecha 2015, y nella calificará la Sidra d´Escoyeta que se peracaba hasta que llegue la nueva collecha, que va arrincar a finales de setiembre.